Suliffeqarfik eqqagassalerisoq ESANI A/S nunatsinni aningaaserivinnik marlunnik isumaqatigiissusiorpoq. Ikuallaaviillu nutaat marluk Nuummi 2023-mi septembarimi, Sisimiunilu 2024-mi februaarimi naammassineqarsimanissaat maanna naatsorsuutigineqarluni.
Nuummi Sisimiunilu eqqakkanut ikuallaaviliornissamut aningaasaliissutit pillugit kommunit peqatigiillutik eqqagassalerinermut ingerlatseqatigiiffiata - ESANI A/S-ip maanna isumaqatigiissusiorfigaa.
ESANI A/S-ip Grønlandsbanken Bank Nordikilu manna atsioqatigivai, ikuallaaviillu nutaat marluk maanna sananeqarsinnaanngussallutik.
- Nuummi ikuallaavik 2023-mi septembarimi naammassineqarluni ammarneqassaaq, Sisimiunilu ikuallaavissap 2024-mi februaarimi naammassineqarnissaa pilersaarutaalluni. ESANI A/S-mi pisortaq Frank Rasmussen taama oqarpoq.
Suliniut ataatsimoorunneqartoq
ESANI A/S, nunatsinni aningaaserivinnik marlunnik Grønlandsbankenimik Bank Nordikimillu atsioqatigeeqqammerpoq, aningaaseriviit taakku marluk tamarmik immikkut aningaasanik 125 millionit koruuninik atukkiillutik.
ESANI A/S 450 millionit koruunit sinnerlugit pisariaqartitsisoq, ESANI A/S-imi siulersuisuni siulittaasup Hans Ulrik Skiftep oqaatigaa. Nuummi Sisimiunilu ikuallaavissat nutaat marluk saniatigut uuliakunik katersuivissanik marlunnik pingasunilluunniit aningaasaliisoqassalluni.
Namminersorlutik Oqartussat kommunillu taarsigassarsiinerisigut aningaasaliissuteqarnerisigulluunniit 100 millionit koruuninik aningaasaliisoqareerpoq, ESANI /S-ilu Sisimiuni Nuummilu eqqakkanik ikuallaavissat ungasianiit kiassarnermut pilersuisussatut isumaqatigiissutigaat, tamannalu ukiuni tulliuttuni 30-ni 600 millionit koruuninik naleqassalluni.
Aningaaseriviit marluk ESANI A/S-imut katillutik 250 millionit koruuninik maanna atukkiipput.
- Taamaattumik kommunit tamarmik, ukua aningaaseriviit suleqatigisatta Namminersorlutik Oqartussallu tamarmiullutik tamanna angusaraat. Taamaattumik qujanartorujussuuvoq, Hans Ulrik Skifte oqarpoq.
Kalaallit Nunaat nukissiuutinik ataavartunik atuisuussaaq
ESANI A/S 2019-imi pilersinneqarpoq, eqqakkanik paassussisarnerup pitsanngorsarneqarnissaa siunertaalluni. Eqqakkanik passussinermik immikkut ilisimasallip taamanikkut oqaatigaa tamanna pitsaasumut alloriarnerusoq.
Suliniutigineqartunullu isumalluarlutik, Frank Rasmussenip erseqqissaatigaa.
Suliniutigineqartunullu isumalluarlutik, Frank Rasmussenip erseqqissaatigaa.
- Suliniut iluatsikkutsigu Kalaallit Nunaat nukissiuutinik ataavartunik atuilluartutut inissisimalissaaq, Frank Rasmussen oqarpoq, nangillunilu:
- Takornariartitsinermullu aamma iluaqutaasinnaasoq isumaqarpunga. Pingaartumik nunani Issittuneersunit, maligassiuilluta. Kalaallit Nunaata avatangiisinik mianerinnittuunera nittarsaassinnaavarput, Frank Rasmussen oqarpoq.
Suliffeqarfik pilersinneqarmat kommuninit tamanit tapersersorneqarpoq. Avannaatali Kommunia kingorna peqaataajunnaarpoq. Eqqakkanik tassani passussinermi ajornartorsiuteqartoqarsimavoq, ESANI A/S-imullu peqataaqqilernissaq maanna aamma kissaatigineqarpoq.
Siulersuisuni siulittaasup pisortallu oqaatigaat Avannaata Kommunianut ammallutik.
Kilde: KNR
decembari-p 21-at 2021 · 09:39Uannga: Ivik Kristiansen, Apollo Jeremiassen ·Nutserisoq: Mads Lynge