Aaqqissuisoqarfik
redaktion@nuukugeavis.gl
North Viking eqqakkat ikuallatassat 905 tonsit Tasiilameersut usillugit sapaatip akunnerani kingullermi RAL-ip containereqarfiata talittarfianut talippoq. North Viking, kommunit taatsimoorlutik eqqagassalerinermut ingerlatseqatigiiffittaavat Esani a/s sinnerlugu eqqakkanik immaqa angallassisalersussaavoq. Tasiilamut Tasiilamiillu angalaneq ingerlalluarsimavoq
aamma aalleqqaarneq Esanimit iluatsilluartutut isigineqartoq ingerlatseqatigiiffimmit tusagassiuutinut nalunaarummi oqaatigineqarpoq.
Esanimi Nunarput tamakkerlugu eqqagassalerinermut ingerlatseqatigiiffiusumi, kommuninit tallimaasunit upernaaq pilersinneqartumi, pisortaagallartumik atorfinitsitsisoqaqqammerpoq. Taanna tassaavoq Kommuneqarfik Sermersuumi ingerlatsinermut avatangiisinullu ingerlatsisoq Frank Rasmussen.
-Nalunngilara eqqumiigineqassasoq eqqagassalerineq pilerigisarsimagakku, kisianni suliassaq soqutiginarluinnartuuvoq, nuna tamakkerlugu iluaqusiisorujussuusinnaasoq, aningaasaqarneq avatangiisillu eqqarsaatigalugit, Frank Rasmussen taamani taama oqarpoq.
Umiarsuaq misilerarneqartoq
Nuna tamakkerlugu eqqakkanut ingerlatseqatigiiffeqalernikkut Esanip eqqakkat maannakkut siunissamilu Nunarput tamakkerlugu illoqarfinni nunaqarfinnilu katersorneqartalersussat pilersaarutit naapertorlugit Nuummi Sisimiunilu eqqakkanut inissiigallartarfinnukaanneqartalissapput. Umiarsuaq siulleq eqqakkanik siullernik aallerluni maanna Tasiilameereerpoq. Esanip North Viking Nunarput tamakkerlugu eqqakkanik aallertartussatut, Nuummullu imaluunniit Sisimiunut assartuisartussatut 2019-ip sinnerani misilerassavaa. North Viking sinersortaataavoq panertunik assartuutitut taaneqarsinnaasoq 1976-imeersorlu. Umiarsuup 3740 kubikmeterit tikillugit annerpaamillu 2.600 tonsinik oqimaassusillit usisinnaavai. Eqqakkanik assartuinerup saniatigut Esanip eqqakkat allat atoqqinneqarsinnaasut assartorneri misilerassavai, nunatta ilaani nunaniluunniit allani atorneqarsinnaasut.
Umiarsuaq saviminernik usisoq
Tasiilamiit eqqakkat usingiarneqareermata North Viking Grenåmut Danmarkimiittumut oqimaatsunik usilluni maanna aallareerpoq, saviminikut sisaallu 1.106 tonsit Stena Recyklingimi atoqqitassanngorlugit suliarineqartussat. Pisortaq Frank Rasmussen ikiuussimasunut tamanut qujavoq: ”Umiarsuarmik usingiaanermi usilersuinermilu RAL containereqarfiup talittarfia atorsinnaasimagatsigu aamma sanaartugassanik suliakkerneqartartut Larsen og Co, Byens Entreprenør, Arctic Transport aamma Godthåb Transportservice tamarmik usingiaanermi usilersuinermilu suleqataasimasut nersualaarluarusuppavut.”Umiarsuaq North Viking Danmarkimut angalareeruni pilersaarutit naapertorlugit Tunumut Avannaanullu eqqakkanik saviminikunillu atoqqitassanngortitassanik aalleqqissaaq.
Eqqakkanik uninngatitsigallartarfik
Eqqakkat maannakkut siunissamilu Nunarput tamakkerlugu illoqarfiit nunaqarfiillu sinnerini katersorneqartalertussat pilersaarutit naapertorlugit Nuummi eqqakkanut inissiigallartarfimmut inaalinneqartalissapput ikuallaavimmilu pioreersumi, nutaap atuutilernissaata tungaanut, ikuallanneqartassallutik. Aamma Sisimiuni eqqakkanut inissiigallartarfiliortoqassaaq,
taavalu Nuummi Sisimiunilu eqqakkanut inissiigallartarfiit 2019-imi ukiap ingerlanerani 2020-milu upernaap ingerlanerani piareernissaat naatsorsuutigineqarluni. Sisimiuni eqqakkat poortukkat eqqakkanut inissiigallartarfimmut inissinneqartassapput, ikuallaasarfissami nutaami ikuallanneqarnissamik tungaannut.
Eqqakkanut ingerlatseqatigiiffik ulapaartussanngortoq
Eqqakkanut ingerlatseqatigiiffiup ilaatigut suliarissavai ikuallaasarfiit marluk ingerlatinneqarnissaat. Ataaseq Sisimiuni ataaserlu Nuummi. Taakkua nuna tamakkerlugu illoqarfinniit nunaqarfinniillu eqqagassanik tigooraaffiussapput. Ullutsinni Nunatsinni eqqaavileriffiit ingerlanneqartut mikisut pisoqalisimasullu ajornartorsiutaapput, ikuallaaniaraannilu teknikikkut atortutigut qulakkeerinniffiusinnaanngitsut, silaannarmik mingutsitsinnginnissamut piumasaqaatinut naammassinnittussamik inuiaqatigiinni nutaaliaasuni naleqassutsimut
akuerineqarsinnaasumik naammassinniffiusinnaanngitsut. Tamannarpiaq pillugu kommunit tamarmik immikkut ikuallaasarfeqarnermikkut tamarmik immikkut naammattunik ikuallatassaateqannginnerisa kingunerisaanik eqqakkat ikuallaasarfinnut marlunnut katersornissaat pisariaqalersimasoq, ingerlatseqatigiiffiup nittartagaani taama allattoqarpoq.
Suliassaq ataatsimoorussassaq
Ikuallaasarfiit qanorluunniit Nuummut Sisimiunullu inissinneqaraluarpata pingaartuuvoq erseqqissaatigissallugu, Esani tassaammat kommuninit ataatsimoorullugu ingerlanneqartoq, ingerlatseqatigiiffiup nittartagaani taama allassimavoq. Imaappoq eqqakkat ikuallaasarfinnut assartorneqarnerini akit, ikuallaasarfiit ingerlanneqarnerinut aningaasartuutit, aningaasaliissuteqarnermi aningaasartuutit aammalu kiammik tunisinermit isertitarineqarsinnaasut ataatsimoortumik naatsorsuuteqarfigineqassapput, taamaalillunilu kommunini eqqagassanik igitsisarnermi assigiimmik akeqartitsissutaasinnaanissaanut tunngaviliisuussalluni. Imaappoq assersuutigalugu Avannaata Kommuniata eqqakkat ataatsimoortut iginniarunigit Qeqqata Kommuniata akiligassaanit amerlanerunavianngitsut, Esanip nittartagaani allassimavoq. Eqqakkanik aaqqissuussineq nutaaq kommunit ileqqaarniuteqarnerattut isigineqassanngilaq. Nunatsinni illoqarfinni nunaqarfinnilu eqqakkat katersorneqartassapput poortorneqarlutillu ikuallaasarfimmut assartorneqarsinnaaniassammata, taamaattumik Frank Rasmussenip ilimagivaa, suliffinnik annaasaqartoqassanngitsoq.
- Illoqarfinni mikinerusuni nunaqarfinnilu immikkoortiterinermut poortuinermullu sulisunik atorfissaqartitsiuassaagut. Ileqqaarutissaq tassaavoq nuna tamakkerlugu eqqakkanik ikuallaasarnikkut kiammik atorluaalersinnaagatta, taamaalillunilu naleqassutsinik annertusisitsissalluni, Frank Rasmussen oqarpoq.
Pilersaarutit naapertorlugit naatsorsuutigineqarpoq,Sisimiuni ikuallaasarfik nutaaq 2022-mi naammassineqassasoqtaavalu Nuummi 2023-imi.