Sisimiuni Nuummilu nuna tamakkerlugu eqqakkanik ikuallaaviit naammassippata, Avannaata Kommunia eqqaavissuarni ammasumik ikuallaasarnissamut immikkut akuersissummik pisinnaajunnaassaaq.
Avatangiisinut Naalakkersuisoq, Kalistat Lund Sermitsiaq.AG-mut allakkatigut akissuteqarluni ilisimatitsivoq.
Taamaammat Avannaata Kommunia nuna tamakkerlugu eqqakkanik ingerlatseqatigiiffimmut, ESANI-mut ilaaleqqinnissamut eqqarsaatersuuteqarpoq. ESANI-p eqqakkat ikuallaavissanut assartortassavai, illoqarfinnilu ikuallaaveqarfiusuni eqqakkanik ikuallaasoqartassalluni.
- Avannaata Kommuniata ESANI-mut ilannguteqqinnissani eqqarsaatersuutigeqqippaa. Tamanna kommunalbestyrelsep ataatsimiinnerini piaartumik oqaluuserineqassaaq, Kalistat Lund Sermitsiaq.AG-mut ilisimatitsivoq.
Avannaata Kommunia ESANI-mit 2019-imi ilaajunnaarpoq, eqqaaveqarnermullu tunngatillugu aaqqiissutissanik nammineq ujartuilersimagaluarluni.
Aaqqiissutissat misissorneqarsimasut
Avannaata Kommunia Qaanaami, Upernavimmi, Uummannami nunaqarfiinilu, kiisalu Ilulissat nunaqarfiini eqqakkanik ammasumik ikuallaasarnissamut immikkut akuersissummik namminersorlutik oqartussanit ukioq manna aamma tunineqaqqippoq.
Immikkut akuersissut 18. junimiit qaammatini pingasuni atuutissaaq.
Avannaata Kommuniata illoqarfimmini nunaqarfinnilu eqqakkanik isumaginninnissamut aaqqiissutissanik maannamut ujartuisarpoq.
Ilaatigut ikuallaaveeqqat pisiarinissaat eqqarsaatigineqarsimapput. Ikuallaaveeqqalli avatangiiseq eqqarsaatigalugu akuerineqarsinnaanngitsut, avatangiisimut naalakkersuisoqarfik ilisimatitsivoq:
- Ikuallaaveeqqat putsup ulorianartuinik najuussorneqarsinnaasunik saliisinnaanermut piumasaqaatinik naammassinnissinnaanngitsutut nalilerneqartariaqarput, nunalu tamakkerlugu eqqakkanik isumaginninnissamut aaqqiissutissamut sanilliullugit akisunerungaatsiarlutik. Ikuallaaveeqqat taama ittut avatangiiseq eqqarsaatigalugu akuersissumik tunineqarsinnaanavianngillaq, Kalistat Lund erseqqissaavoq.
Ingerlatseqatigiiffik ingerlalluartoq
Sanaartornermut pilersaarut malillugu Sisimiuni Nuummilu ikuallaavissat, siulleq 2022-mi aappaalu 2023-mi naammassinissaat naatsorsuutigineqarput.
Avatangiisinut naalakkersuisoq ilisimatitsivoq nuna tamakkerlugu ikuallaavinnik ingerlatsineq misilittagaqarfigilluarneqalereersoq.
- Eqqakkanik isumaginninnermut tunngatillugu aningaasaqarnermut avatangiisinullu aaqqiissut pitsaanerpaaq tassaavoq kommunit tarmamiullutik eqqakkanik ikuallaanissamut suleqatigiinnissaat. Aqqut taanna pitsaasumik misilittagaqarfigilereerparput, taamalu ingerlassaagut, ilisimatitsivoq.
Kilde: Sermitsiaq
KASSAALUK KRISTENSENThursday, 22. July 2021