Kikkut tamarmik eqqakkanik igitseqataasarnissaat pingaaruteqarpoq, aamma kommunimi eqqagassalerinermut maleruagassat innuttaasunit inuussutissarsiortunillu ilisimaneqarnissaat pingaaruteqarpoq, kommunit ataatsimoorlutik eqqagassaleriffianni Esanimi pisortaq, Frank Rasmussen, oqarpoq.
– Piffissami ikaarsaariarfiusumiippugut, tamatumanilu ilaatigut eqqakkanik igitsisarnermi periaatsimik nutaamik atuilersussaalluta, angerlarsimaffimmit suliffeqarfimmiillu kiisalu kommunimiit, ilaatigullu eqqakkannik ukiunit arlalinneersunik igitsisussanngorsimalluta. Maanna maleruagassaq pingaarneq tassaavoq, eqqagassanik pilersitsisoq kommunimi eqqagassalerinermut maleruagassani aalajangersarnartutut aqunneqartumik igitassanngortitsinermut akiliuteqartalissasoq, Frank Rasmussen, kommunit ataatsimoorlutik eqqagassaleriffianni Esani A/S-imi pisortaasoq, kiisalu Kommuneqarfk Sermersuumi avatangiisinut pisortaasoq, aviisimut Sermitsiamut oqarpoq.
– Eqqagassalerinermik aqutseriaatsip nutaap inissinniarnissaanut maleruagassallu nutaat atuutilersikkiartuaarnissaannut ukiunik marlunnik piffissaqarpugut, taavalu ikuallaaviit piariissallutik. Tamatuma saniatigut Sisimiuni Nuummilu eqqakkanik inissiigallartarfinnik siullernik oktobarimi novembarimilu pigisaqaleriissaagut. Ikuallaaviit nutaat marluk ukiut marluk qaangiuppata piareernissaata tungaanut taakkunani eqqakkanik toqqortarinninnissamut inissaqarpoq. Piffissami tassani ikuallaaviit pisoqaanerusut ingerlaannassapput eqqakkanillu nunatsinnit tamarmik tigooraassallutik.
– Eqqagassalerinermik aaqqissuussineq nutaaq tamatsinnut allanngornerujussuussaaq, kisianni iluatsissaqqaarparput, Frank Rasmussen oqarpoq.
Suliffeqarfiit akisussaaffiat
– Suliffeqarfiit eqqagassaatitik CSR-imik periusissiaminnut ilanngullugit eqqarsaatigisariaqarpaat. Eqqagassaatitik immikkoortitertassavaat. Eqqagassat uumassusilinneersut najukkami isumagineqarsinnaasariaqarput imaanut aniatinnerisigut imaluunniit nunamut assaannerisigut, taakkunanilu saanngutinngortinnerisigut.
– Savimerngit saffiugassallu nunatsinnit tamarmeersut Europami atoqqitassanik niuerfinnut assartortassavavut.
– Plastikkit, pappiarat qisuillu ikuallattassavavut – ullut ilaanni qisunnik sequtsigaaraliorsinnaanngornissatta tungaanut. Plastikkinik ullut ilaanni immaqa aamma atoqqiisinnaanngussaagut.
– Suliffeqarfiit eqqagassaatiminnik eqqaavissuarnut igitsiartuinnarsinnaassanngillat. Kommunimi maleruagassanik malinnittariaqarput najukkamilu maleruagassat naapertorlugit igitsisariaqarlutik. Maani Kommuneqarfik Sermersuumi paasigutsigu suliffeqarfik maleruagassat avaqqullugit eqqagassanik eqqaavissuarmut igitsisimasoq, taava igitaminnik aalleqqeqqullugit nalunaarfigineqassapput, taamaanngippallu uagut aassavavut eqqagassanillu pilersitsisup akiligassaanik igitassanngortitsissalluta, Frank Rasmussen oqarpoq.
Sermitsiaaq
REDAKTIONENSunday, 26. July 2020