Ulluni makkunani Nuna Tamakkerlugu eqqakkanik ingerlatsiviup nutaap eqqakkanik aallernera siulleq ingerlanneqarpoq. Tamanna ingerlanneqarpoq umiarsuaq usinik assartuut North Viking atorlugu, taannalu Esani a/s-imit 2019-ip sinnerani misilerarneqassaaq Nunatta sinneranut eqqakkanik aallertartussatut. Eqqakkanik aallerfissaq siulleq tassaavoq Tasiilaq North Viking-illu Tasiilamut tikinnissaa naatsorsuutigineqarpoq aggustip sisamaani tallimaaniluunniit. North Viking sinersortaataavoq panertunik assartuutitut taaneqarsinnaasoq 1976-imeersorlu. Umiarsuup 3740m3 tikillugit annerpaamillu 2.600 tonsit usisinnaavai.
Nuna tamakkerlugu eqqakkanik ingerlatsivik nutaaq atorlugu siunissami Esani a/s-ip illoqarfinnit talittarfinnit ikuallaavinnut Nuummi Sisimiunilu nutaanut marlunnut assartuineq isumagissavaa.
Eqqakkanik assartuinerup saniatigut Esani a/s-ip misilerassavaa eqqakkat allat atoqqinneqarsinnaasut assartorneri, nunatta ilaani nunaniluunniit allani atorneqarsinnaasut.