Eqqakkanut naqiterutitaap eqqakkat Sisimiuni Nuummilu ikuallaavissanut nassiunneqartalernissaanut qulakkeerinnittussaq Aasianni atoqqaarfissiortinneqarpoq.
Eqqakkanut naqiteriviup atoqqaarfissiorneqarnerani Kommune Qeqertalik innuttaasunut sisamanngormat kaffillerpoq.
Kommune Qeqertalik
Eqqakkanik naqiterut eqikkaasartorlu Aasianni atorluarneqalereerpoq. Nunaqarfinni eqqakkat maanna Aasianni nassiunneqarsinnaalerput. Nuummi Sisimiunilu ikuallaavissat 2023-mi aallartippata eqqakkat ikuallaavinnut nassiunneqariaananngorlugit.
- Eqqakkanut eqiterissutip atoqqaartinneqarnera allioriarneq annertuujuvoq, Naalakkersuisut eqqakkanut iliuusissanut pilersaarutaannut ukiuni 2020-2031-mut atuuttoq eqqarsaatigalugu, borgmesterip tullia siulleq Frantz Lundblad Aasianni sisamanngornermi atoqqaarfissioqqaartitsinermi oqalugiarnermini ilaatigut taama oqarpoq.
Niels Sandgreenip qalersaq aappaluttoq kipivaa
Eqqakkanut naqiteriviup atoqqaarfissiornerani Kommune Qeqertaliup innuttaasunut kaffillerpoq. Eqqakkanut naqiteriviup atoqqaarfissiorneqarnissaanut ikuallaavimmi sulisut akornanni sivisunerpaamik sulisimasoq Niels Sandgreen-imit qalersaq aappaluttoq kipineqarpoq. Niels Sandgreen ukiut 19-nit sulinermini eqqakkanik eqiterutitaarneq poortuisalernerlu nuannaarutigivai:
- Kiisami suliaq pissanganarpoq aamma ingerlallualeriarutta poortuiagaatsigartassaagut, maskiina ingerlalluni suliaqarnera sukkaqaaq. Ingerlaannaq eqqakkat eqitikkat pingasut poortupallattarpai, poortukkallu illuarlutigit nooreeraangatsigit aamma sequtseriutigaluni taamatut poortueqqipallattarpoq, Niels Sandgreen qalersamik kipisereerluni taama oqarpoq.
Namminersorlutik Oqartussat eqqakkanut pilersaarutaat
Eqqakkanut iliuusissanut pilersaarutip siunnertaraa eqqakkanik passussinermi igitassanik tigooraaveqarfinnik pilersitsiortornissaq. Siunertaq eqqarsaatigalugu Kommune Qeqertalik eqqakkanik eqiterissummik maanna piareersimasuuteqalerpoq:
- Tamannalu nunatsinni kommunit ataatsimoorussamik eqqakkanik ingerlatseqatigiiffiat Esani a/s suleqatigilluinnarneqarpoq, tassami maani Aasianni eqqakkat eqiterneqartut siunissami Sisimiunut umiarsuakkut nassiunneqartalissapput, Sisimiunilu ikuallanneqartartussaallutik, Frantz Lundblad (IA) oqarpoq.
Kommunillu eqqakkat Kitsissuarsunneersut, Akunnaameersut aamma Ikamiuneersut Aasiannut nassiunneqartalernissaat pilersaarutigaat. Takorluukkanullu aamma ilaavoq Aasianni eqqakkat eqiterneqartartussat ilagissagaat Niaqornaarsummeersut Iginniarfimmeersullu, Kangaatsiami eqqakkat inississorneqarnissaannut inissaqanngimmata. Kommune Qeqertalik paasissutissiivoq.
Esani A/S Kommune Qeqertalimminngaanniit piginneqataaffigineqartoq, kommunit piginneqataasut akunnerminni eqqakkanik suliaqarnermi misilittakkanik assigiinngitsunik avitseqatigiilluni oqalliffimmik pilersitsisimavoq, maannalu atoqqaarfissiukkatsinniit misilittagarilerumaarneqartussat, oqalliffimmi Esani A/S-imi pilersinneqarsimasumi avitseqatigiissutaasarumaartut qularnanngilaq.
Nuummi ikuallaavissaq 2023-mi naammassinissaa naatsorsuutigineqarpoq, Sisimiunilu 2023-p naanerani 2024-lluunniit aallartinnerani atoqqaarfissiorneqarnissaa naatsorsuutigineqarluni.
Kilde: Sermitsiaq
NINA-VIVI MØLLER ANDERSENSaturday, 25. September 2021