Nukissiorfiit kommunillu ataatsimoortumik eqqakkagassalerinermik ingerlatseqatigiiffiat ESANI A/S Sisimiuni Nuummilu eqqakkanik ikuallaavissanit kiassap pilersinneqartup ungasianit kiassarnermut atorneqarnissaa pillugu isumaqatigiissuteqaqqammipput.
Suliffeqarfiit tusagassiutinut nalunaarummi allapput.
Piumasaqaatit malinneqassapput
Taamaalilluni suleqatigiinnerup qitiusumik eqqakkanik ikuallaaviit ilimagineqartutut 2022/23 atulerpata, Kalaallit Nunaanni eqqakkanik passussisarnermi ullut nutaat aallartinnerat taamaalilluni malunnartippaa.
- Sisimiuni Nuummilu eqqakkanik ikuallaaviit nutaat muteerniusullu maanna atorneqartunit avatangiisinut qajassuarnerujussuupput, taamatullu aamma ikuallaavinnut allanut EU-miittunut avatangiisinut qaffasissumik piumasaqaatinut naammassinnissallutik. Ikuallaaviit ulloq unnuarlu eqqakkanik 60 tons missaannik passussisinnaassapput, nalunaarutigineqarpoq.
Eqqakkanik ikuallaavinnit kiassarneq pilersinneqartoq Sisimiuni Nuummilu innuttaasunut suliffeqarfinnullu ungasianit kiassaatitut atorneqassaaq, taamaalillunilu ungasianit kiassaatit aqqutaat annertusarneqassapput, ilutigisaanillu eqqakkat pisuussutitut iluaqutinngortinneqassallutik.
Eqqagassat assartorneqartalissapput
Ikuallaaviit nutaat atulerpata, ikuallaaviit pisoqqat nungullarsimasullu kiisalu nunaqarfinni ikuallaaviit matuneqassapput.
Taarsiullugu eqqakkat katersorneqartarnerat aaqqissuunneqassaaq, poortorneqartalerlutik ikuallaavinnullu nutaanut assartorneqartalerlutik, taamaaliornikkullu illoqarfiit nunaqarfiillu ilaanni eqqakkat katersorneqartarnerisa kingunerannik unammillernartut aaqqinneqassapput.
- Nunatsinni eqqakkanik ajornartorsiutit muteerniusumik pisariitsumillu aaqqinneqarsinnaalernerat nuannaarutigaarput. Tamanna illoqarfippassuarni nunaqarfippassuarnilu maannakkutut eqqakkanik passussillunilu katersisarunnnaartussani malugineqarsinnaalissaaq, qitiusumilu eqqakkanik ikuallaavinnit kiak pilersinneqartup iluaqutigineqarsinnaalernerata aaqqiineq suli pitsaanerulersippaa, ESANI A/S-mi siulersuisut siulittaasuat Lars Møller-Sørensen ESANI A/S-milu pisortaq Frank Rasmussen oqarput.
Qajassuussineq piujuartitsinerlu
Ataatsimoortumik kiassarnermik pilersuineq orsussamik imerpalasumik atuinermik annikillisaanermik siunertaqartumik annertusarneqarnissaa kiisalu eqqakkat pisuussutitut isigineqarnissaat taamatullu eqqakkanik ikuallaavinnit kiammik sinneqartoorut ilaatigut ungasianit kiassaatitut atorlugu iluaqutinngortinneqarnissaa.
- Taamattaaq isumaqatigiissutip aamma Naalakkersuisut eqqakkanik passussineq pillugu iliuusissatut pilersaarutaanik ikorfartuisuuvoq, taamaalillunilu Kalaallit Nunaannik minguinnerusumik, avatangiisinut qajassuussinerusumik piujuartitsinerusumillu pilersitseqataalluni.
Kilde: Sermitsiaq
REDAKTIONEN Friday, 25. December 2020 - 15:00