Raatiukkut aallakaatitassiaq ESANI-mut tunngasoq

Oprettet d.

Raatiukkut aallakaatitassiaq ESANI-mut tunngasoq
Raatiukkut aallakaatitassiaq ESANI-mut tunngasoq

Nunatsinni sumiiffinni tamani eqqaavissuaqarneq qangali ajornartorsiutaasartoq qanoq iliuuseqarfigineqalerluni pitsanngorsarniarneqaleruttorpoq. Tamanna ingerlatsivimmit nutaamit, kommuninit Namminersorluni Oqartussanillu aningaasalersorneqartumit siornalu pilersinneqartumit, ESANI A/S-imit siuttuuffigineqassalluni.

 

Ingerlatsivik siorna februaarip aallaqqaataanit pilersinneqarmat, kommunit ingerlatsiviup aallartisarneqarneranut peqataasut tamarmik immikkut 10 millioner koruuninik aningaasaleeqataasussaapput, Namminersorluni Oqartussat 50 millioner koruuninik aningaasaleeqataasussat.

 

Ingerlatsiviup siunertai tassaapput eqqaavilerineq, sulisoqarneq, atoqqiineq nukissiuuteqarnerlu. Suliniutillu taakku oqaaseqartaasa aallaqqaataat malillugit ingerlatsivimmut ESANI-mut taajuutigineqalerluni.

Kommunit ataasiakkaat eqqakkanik ikuallanneqarsinnaasunik immikkoortiterisassapput, taakkulu ikuallaavissuarnut Sisimiuni Nuummilu pilersinneqartussanut nassiunneqartassallutik.

Eqqakkat allat soorlu uuliakut aamma katersorneqartassapput taakkulu minguaviaavinnut, sumiiffinni assigiinngitsunut pingasunut inissinneqartussanut, nassiunneqartassallutik. Allat soorlu savimerngit atoqqinneqarsinnaasut katersorneqartassapput tuniniarneqartassallutillu.

 

Savimerngilli eqqaavissuarnut allanulluunniit igiinnarneqartartut amerlanersaat tuniniarneqarsinnaassanngitsut ingerlatsiviup pisortaa, Frank Rasmussen Inuiaat Tillernerannut oqaluttuarpoq:

- Savimerngit igitat amerlanersaat atoqqinneqarsinnaanngillat aamma katersorneqartarneri pisariulluni. Pingaarnerpaasorli tassaavoq sumiiffinni ataasiakkaani eqqaavissuit minguiarneqarnissaat atorunnaarsinneqarnissaallu.

 

Frank Rasmussen oqarpoq naqissuserlugulu oqarluni eqqaavissuarni savimerngit piiarneqarpata taakkunani saliinissaq pisariinnerulerumaartoq.

- Saviminikut piiarneqareerpata eqqakkat ulorianartut allat soorlu uuliakut, qassutikut batteriikullu katersorneqassapput taamaalioreernermi eqqakkat ikuallariaannaat katersorneqarlutik immikkoortiterneqassallutik, ESANI A/S-ip pisortaa oqarpoq.

 

Nunatsinni illoqarfinni marlunni eqqakkanik ikuallaavissat marluk sanaartorneqarnissaat aallartisarneqalereerpoq. Taakku Nuummi Sisimiunilu inissinneqassallutik. ESANI A/S-ip pisortaa aperaara, sooq illoqarfinni tamani ikuallaavissanik sanaartortoqassannginnersoq. Tamanna pillugu Frank Rasmussen ima akivoq:

- Eqqakkanik ikuallaaviit mingutitsinngitsumik ikuallaasinnaasut akisoorujussuupput aamma ikuallaaviit eqqagarpassuarnik ikuallaasinnaasut angisuujusariaqarput ikuallatat pitsaasumik ulorianartorsiortitsinngitsumillu pineqartassappata. Illoqarfiini tamani ikuallaavinnik pilersitsissagaluarutta taakku eqqakkanik ikuallatassanik naammaqqajanngitsunik ikuallaasinnaanngillat.

 

Taamaattumilluuna illoqarfinni taamaallaat marlunni pilersitsinissarput kissaatigisimagipput, ESANI A/S-ip pisortaa Frank Rasmussen oqarpoq.

 

Nunatsinni kommunit sisamaasut Kommune Qeqertalik, Qeqqata Kommunia, Kommuneqarfik Sermersooq aamma Kommune Kujalleq suleqatigiillutik eqqaavissuarnik atuiunnaarnissaq siunertaralugu ingerlatsivimmik aallartitsipput. Kommunit peqataasut tamarmik ukiuni tulliuttuni sisamani atuuttussamik katillugit 10 millioner koruuninik aningaasaliillutik taamatullu Namminersorlutik Oqartussat 50 millioner koruunik aningaasaliillutik. Tamanna pillugu ESANI A/S-ip pisortaa, Frank Rasmussen siullermik ima oqarpoq:

- Illoqarfinni eqqaavissuit atorunnaarsinneqarnissaat pillugu suliniutip aallartisarneqarnera ukiut sisamat qaangiuppata naammasineqarpat taava kommunit peqataasut ataasiakkaat tamarmik immikkut 10 millioner koruuninik aningaasartuuteqareersimassapput. Tassalu taamaasillutik kommuniminni eqqaavilerinerup pitsanngortinneqarnissaanut suleqataassalutik, Frank Rasmussen oqarpoq.

 

Ikuallaavissarsuit marluk piareerpata kommunit assigiinngitsut eqqakkanik Nuummut Sisimiunulluunniit nassiussisartussaassapput. Tamannali pitinnagu eqqakkanik immikkoortiterisarnerit suliarineqartassallutik.

 

Ikuallaavissuit marluk eqqakkanik ikuallassinnaasunik pilersorneqarneranni kommunit ataasiakkaat ukiumut 3 millioner koruuninik akiliisalersussaassasut ESANI A/S-ip pisortaa oqarpoq.

- Eqqakkanik ikuallassinnaasunik qanoq annertutigisunik kommunit ataasiakkaat nassiussisarnissaat apeqqutaalluni akiliisartussaapput. Ullumikkulli ilisimasagut naapertorlugit kommuni ataaseq eqqakkanik 5.500 tonsinik nassiussisinnaavoq, tassalu 1 tonsimik nassiussinermi 610 koruuneertassallutik.

 

Tusaasiuk raatiukkut aallakaatitassiaq